हेमंत सरकार के चौथी पारी, सीएम शपथ लेंगे अकेले

हेमंत सरकार के चौथी बार शपथ ग्रहण

विश्वास मत के बाद होई कैबिनेट के विस्तार

हेमंत सोरेन गुरुवार के साँझ चार बजे झारखंड के मुख्यमंत्री के तौर पर चौथी बेर शपथ लिही। रांची के मोरहाबादी मैदान में होखे वाला शपथ ग्रहण समारोह में देश भर से ‘इंडिया’ ब्लॉक के प्रमुख नेता जुटी रहिहें।

शपथ ग्रहण के पहिलहीं हेमंत सोरेन राज्य के जनता के नाम एगो संदेश में कहलन, ‘विधानसभा चुनाव में झारखंड के जनता के ‘सोना झारखंड’ के निर्माण खातिर जे ऐतिहासिक, अद्भुत आ अविस्मरणीय संदेश दिहलस, उ हमनी के आगे के राह देखाई। वीर पुरखन के सपनन आ राज्यवासियन के आशा-आकांक्षा के पूरा करे खातिर अबुआ सरकार पूरा संवेदनशीलता आ नई ऊर्जा के साथ काम करी।’

नया सरकार के मंत्री के नाम अभी तय ना भइल बा, एह से हेमंत सोरेन अकेले शपथ लीहें। सरकार के करीबी सूत्र के हिसाब से, विधानसभा में विश्वास मत साबित कइला के बाद मंत्रिमंडल के विस्तार कइल जाई। समारोह के भव्य बनावे खातिर सब तैयारी पूरा कर लिहल गइल बा।

कार्यक्रम में एक लाख से ज्यादे लोग के जुटे के उम्मीद बा। सड़क पर ट्रैफिक के बोझ देखत, आज रांची के सब सरकारी आ प्राइवेट स्कूल बंद रखल गइल बा। शहर में ऑटो आ ई-रिक्शा के चलावल भी प्रशासन द्वारा बंद करा दिहल गइल बा।

शपथ ग्रहण समारोह में कांग्रेस अध्यक्ष मल्लिकार्जुन खड़गे, लोकसभा के नेता प्रतिपक्ष राहुल गांधी, एनसीपी के अध्यक्ष शरद पवार, पश्चिम बंगाल के मुख्यमंत्री ममता बनर्जी, आम आदमी पार्टी के अध्यक्ष अरविंद केजरीवाल, समाजवादी पार्टी के अध्यक्ष अखिलेश यादव, मेघालय के मुख्यमंत्री कोराड कोंगकल संगमा, पंजाब के मुख्यमंत्री भगवंत सिंह मान, हिमाचल प्रदेश के मुख्यमंत्री सुखविंदर सिंह सुक्खू, सीपीआई एमएल के महासचिव दीपांकर भट्टाचार्य, शिवसेना (उद्धव) के अध्यक्ष उद्धव ठाकरे, जम्मू कश्मीर के पूर्व मुख्यमंत्री महबूबा मुफ्ती, तमिलनाडु के डिप्टी सीएम उदय स्टालिन, कर्नाटक के डिप्टी सीएम डी.के. शिवकुमार, बिहार विधानसभा के नेता प्रतिपक्ष तेजस्वी यादव, दिल्ली के पूर्व डिप्टी सीएम मनीष सिसोदिया, बिहार के सांसद पप्पू यादव आ आम आदमी पार्टी के राज्यसभा सांसद संजय सिंह समारोह में मौजूद रहिहें।

हेमंत सोरेन झारखंड में मुख्यमंत्री के रूप में चौथी बेर शपथ लेवे वाला पहिला नेता होइहें। पहले उनकरा पिता शिबू सोरेन आ भाजपा के अर्जुन मुंडा तीन-तीन बेर मुख्यमंत्री पद के शपथ ले चुकल बाड़न। हेमंत सोरेन पहिला बेर 13 जुलाई 2013 के झामुमो, कांग्रेस, राजद के गठबंधन के सहारे मुख्यमंत्री पद के शपथ लिहलन। ई सरकार के कार्यकाल 23 दिसम्बर 2014 तक रहल। दोसरा बेर उनकर शपथ 29 दिसम्बर 2019 के भइल। 31 जनवरी 2024 के ईडी द्वारा गिरफ्तार भइला के बाद उ मुख्यमंत्री पद से इस्तीफा दिहलन। जमानत पर बाहर आवे के बाद 4 जुलाई 2024 के उ तिसर बेर मुख्यमंत्री पद के शपथ लिहलन।